احمد احمد احمد !!انا طالع الدرج واناظر وراي ! هلا ناصر وشتبي؟ قال :كلمتني .
منهي ؟ قال : مها . ايه بنت عمك. وطلع يقمز قدامي على الدرج فرحااااان.
(انا وناصر من سكاكا وندرس بالمعهد الصحي بالرياض عام 1410 وماخذين شقه بحي الروضة ، وناصر بالنسبه لي اكثر من صديق زي اخوي والولد وسيم ومها هذي بنت عمه صغيره عمرها 13 سنه بس البنت ماشاالله عليها العين القشرا ماتشوفها ملاك)
المهم ، طلعنا الشقه فوق وقعد يسولفي عنها ويبغى يصارحها بحبه بس خايف ما تفهمه ويقول خليني أأجل الكلام بعد مااخلص المعهد حنا باول سنه والمعهد 3 سنين ، مضت سنه وسنتين وحنا بس شغلتنا مهاوي جنني بس يسولف عنها وكان بالعطله يروح لبيت عمه بس عشان يشوفها.
المهم صرنا سنه ثالثه في يوم قالي ناصر : احمد وشرايك اكلمها؟ ليه ماعمرك كلمتها ؟ قال: مرات بس رسمي . يعني تبغى تفاتحها بالموضوع ؟ قال : ايه. كيفك .
دق ناصر ****04642 رقم عمه . الو مرحبا.. هلا من انت؟ هلا مها انا ناصر
هلا ناصر وش اخبارك وشلون دراستك .
ناصر : والله الحمد الله تمام الا وين عمي ؟
مها : ابوي طالع المزرعه مره اخوك فهد، تبغى شي ؟
ناصر :لاوالله بس ابغى اسلم عليه زمان ماشفته ولاسمعت صوته . على العموم سلميلي علية وانا بكره ادق عليه
مها :يبلغ السلام
ناصر : اوكي مع السلامه
مها : مع السلامه
طبق السماعة ناصر وانا جالس مقابله قال : يايولي ياأحمد عجزت لا تكلم ماقدرت اقولها شي . الله من الجبانه بالراس . قال : لا والله انحرجت
قلت له : عمك وشهو من رجال
قال : شديد مره وهذا اللي مخوفني
قلت : ليش ماتخلي ابوك يخطبها لك
قال : توني ماتخرجت ويبغالي عشان اكون نفسي
قلت : خطبه بس
قال : اخوي الكبير فهد توه بعد ماخطبناله
المهم ، ثاني يوم دق ناصر على بيت عمه الا مها تبكي
ناصر : مها وشفيكي
مها : ابوي في المستشفى
ناصر : ليش ؟
مها :ما ادري دق على فهد جا واخذه للمستشفى
ناصر :طيب انا ادق على فهد الحين اشوف وش صار مع السلامه .
اتصل ناصر على بيتهم ورد عليه اخوه فهد
ناصر : مرحبا فهد وشلون عمي
فهد : ما عليه توني جيت منه
ناصر : طيب ليش تنوم بالمستشفى
فهد : لا شوية ارهاق يومين ويطلع انشاالله، الا من قالك
ناصر : انا اتصلت ابغىعمي وقالت لي مها
فهد : الا على طاري مها نسيت لاطمنها
ناصر : لا خلاص انا اكلمها واطمنها يالله مع السلامه
بعدها ناصر لقاها حجه باليوم يتصل مرتين هاه وش اخبار عمي ؟
المهم جلس عم ناصر حول اسبوع ويوميا يتصل ناصر ببيت عمه وباحد المكالمات ردت مها :
مها : هلا ناصر
ناصر : هلا مها هاه وش اخبار عمي ؟
مها : ابشرك بيطلع بكره الدكتور اليوم قالنا .
ناصر : الله يبشرك بالخير طيب انا اتصل بكرة يالله مع السلامه
مها : لحظه ناصر
ناصر : هلا ياعيون ناصر ( يقول :مدري وشلون طلعت مني )
مها : تسلم عيونك ، سبقتني ابغى اقولك ...
ناصر : قولي مها
مها : ناصر انت اكثر من انك ولد عم ، انا بحياتي مافكرت بانسان غيرك .
ناصر :مها انا لي سنتين وانا ابغى اصارحك بس ماقدرت وهالحين اقولك ان حبك فجر
صدري وملا الكون كله آه يامها وش كثر مشتاق لك
مها : ماودي انهي المكالمه بس امي هنا يالله بس لاتطول علي عاد!
ناصر : يالله حبيبتي
طبق السماعه ناصر وهو ماهو مصدق ويصارخ يناديني جيت انا وقال: لي صارحتها حبي قلت: وشلون ؟ قال لي السالفه قلت : هي اللي صارحتك مهو انت . قال : المهم انها تدري هالحين اني احبها. وبعدها بدت المكالمات مرات يجلسون للصبح وصار مصروفنا كله ندفعه لفاتورة التلفون وبدت رسايل الغرام وكل اسبوع ناصر راكب الطيارة وين ؟ للجوف مره لقيت رساله مع ناصر من مها فيها كرت عليه صورة ورده حمرا ومكتوب علية ( لو كان الحب كلمات تكتب لانفذت احباري ولكن الحب ارواح توهب فهل تكفيك روحي ؟ ) وتحت توقيع مها, ومرة كانت فيه مجله عليها صورة ديانا سبنسر ( ملكة جمال العالم ) قلت له وشهي من ديانا حبيبتك ياناصر قال : والله احلى الف مرة منها
المهم ان مها صارت كل حياة ناصر ما يتكلم الا عنها حتى فالنوم يقعد يهذي باسمها
وهي بعد حتى مره قالت له : ناصر انا اذا مااخذتك ترى اموت . قال لها : سلامتك من الموت والله انا اللي اللي اموت لو ما اتزوجنا بس انشاالله نتزوج ما فيه أي عقبه انت بنت عمي وانا احق فيكي من أي بشر بالدنيا.
الحب اللي بين ناصر ومها ما احد يدري عنه الا هم وانا بس لان ابوها شديد مره وييمكن يذبحها اذا درى
المهم ، حنا جالسين انا وناصر بالشقه الا التليفون يدق :
الو السلام عليكم وين ناصر
ناصر : عليكم السلام هلا فهد يالقاطع وينك
فهد : والله مشغول
ناصر : وشلونكم وشلون ابوي وامي
فهد : طيبين ويسلمون عليك وباركلي تراي بكرة ابغى اخطب
ناصر : الف الف مبروك ياخوي ومن هي سعيدة الحظ
فهد : وحده كنت احبها زمان بس كانت صغيرة وهالحين قرنست ( اكتملت )
ناصر : منهي
فهد : بنت عمي مها
طاحت السماعة من يد ناصر واغمى علية ولا صحى الا في المستشفى
ومن ثاني يوم راحوا يخطبون لفهد وابو مها على طول وافق بدون أي شروط ولا اخذ راي مها ولا سألها وبلغهم الاسبوع الجاي الملكه ، ومنهو يقدر يقول لا لعم ناصر!!!
وناصر طلع من المستشفى واتصل على مها هو يبكي وهي تبكي وقال وش تيغين تسوين قالت: مدري قالت وانت قال انا ابغى انزل الجوف اليوم .
انا رفضت اخليه يروح لان الاختبارات النهائيه باقى عنها اقل من اسبوع وحنا بآخر سنه ناصر ماراح حتى لو راح وش يبغى يسوي ؟
وبعد اسبوع صارت الملكه لفهد على مها والبنت ماتت من البكا ولا احد داري ليش؟
ناصر بس جالس بالمجلس ويبكي ، ناصر قرر انه يسافر الجوف وافنعني قلت تري يومين بس وتجي . رحت ابغى احجزله قال : لا ابغى اسافر بالسيارة عند ناصر وطلع بعد صلاة العصر انا حطيت التلفون عند راسي ونمت اتحرى ناصر اذا وصل يكلمني
صحيت الصبح حوالي الساعو 10 على رنة التلفون قلت اكيد ناصر
الو صباح الخير
الو صباح النور هلا فهد
فهد : وين ناصر قله ترى حددنا يوم العرس اول يوم بالعطلة
قلت: ناصر سافر الجوف امس
فهد : ما وصل لاهالحين
المهم اتصالات وشرطه ومرور ومستشفيات ونحصل سيارة المرسيدس بالارطاوية تحت شاحنه وناصر بثلاجة الموتى بمستفى الارطاويه
مها دخلت الصحة النفسية وتزوجت بعد سنه يوم بيت فهد و10 ايام بالنفسيه .....
تحياااااااااااااااااتي لكم
الأربعاء مارس 28, 2007 6:58 pm
